Let it go~ Let it go~ 呢首有關姐妹情、兄妹情嘅歌大約十年前出現非常爆紅，亦都好好聽，直到今日都仲聽到有新嘅朋友認識呢首歌。大家知唔知原來呢首歌係出自邊套電影…！？無錯，就係《魔雪奇緣》，Frozen。好多人都有睇過Frozen呢套電影，我身邊都有好多朋友睇過，不過出乎意料之外大部份人都冇同我感同身受嘅感覺。以下就同大家分享吓，我對Frozen同埋Let it go感受過一啲見解，有關兄妹情嘅比較獨特嘅見解。
姊妹情為何破滅？
Frozen呢套戲係講親姊妹之間嘅感情（我嘅例子係兄妹情），我相信冇人會有異議，但我覺得佢更加係想講， 父母唔識教仔女，令到兄弟姊妹關係疏離。 個故事係講家姐Elsa自細就識得魔法可以噴啲冰出嚟，Elsa就成日噴啲冰出嚟同佢妹妹Anna玩， 例如噴冰出嚟同Anna砌雪人。不料， 有一次兩姊妹玩玩下，Elsa唔小心將啲冰噴到Anna，Anna受咗傷，父母知道Elsa因為用魔法而唔小心整傷左Anna之後，竟然整出一啲超級無理嘅規定。
Elsa嘅父母竟然規定Elsa以後要困自己係間房入邊， 以後唔准再同Anna玩，更加要戴上一對令佢以後唔識噴冰放冰手套。 睇到呢度我相信有絕大部份朋友都覺得係一個虛構嘅魔幻故事， 但如果同你講現實世界有父母真係會咁樣對仔女，你點睇？ 我有一個細佬、一個細妹，事實上，我細個嘅時候就係完完全全發生過一模一樣甚至更離譜嘅事。
細個嘅時候大約係五六年級至初中，嗰時個年紀比較百厭，鍾意玩啲無厘頭嘅嘢，例如打下機、睇吓卡通片，總之就一定唔係鍾意溫習同讀書。父母望子成龍，眼見我都唔用功讀書，就覺得我呢啲頹廢荒廢學業嘅態度會教壞細佬妹，令到佢哋未來人生失敗， 佢哋竟然同細佬妹講以後唔准同阿哥玩，然後我一同佢地玩阿媽就會拉開。細佬細佬妹唔單只係阿媽嘅仔女，其實亦係我兒時最親近嘅同伴，難以想像一個小朋友明明冇做錯事，但係被當作一個異類看待， 仲要被迫同小夥伴拆夥， 心理陰影面積究竟有幾大？
Do you want to build a Snowman
自此之後我好傷心成日自己匿埋喺房。 最虐心係諗返起細佬妹嗰陣時真係有敲門，阿媽依家唔係屋企，問我一唔一齊出嚟玩一齊出嚟打機， 但我都唔想睬佢地，因為費事玩玩下阿媽返屋企見到我哋一齊玩緊就說三道四， 呢個情景正正就係「Do you want to build a snowman」！呢首歌其中令我最虐心係呢2句歌詞：
We used to be best buddies
And now we’re not
I wish you would tell me why!
意思係「我哋以前明明係好朋友，但係而家突然唔再friend， 我想你話我知究竟發生咩事._.」 真係有口難言，嗰時我都係10靚歲，細佬阿妹仲細幾年，得個幾歲，我都唔知點同佢哋解釋係阿媽唔俾我哋一齊玩，唔係我唔想同佢玩。就算解釋比佢聽係阿媽唔俾，如果佢問點解唔俾，我都解釋唔到，因為我根本就覺得阿媽係做錯。 我究竟做錯啲乜？就只係唔夠俾心機讀書，但又冇害細佬妹，點解就唔俾我再同佢地玩？
Do you wanna build a snowman?
It doesn’t have to be a snowman
「喂～切唔切雪人啊？ 其實唔一定砌雪人㗎喎，玩其他嘢都得姐～快啲出嚟一齊玩啦(*ﾉ・ω・)ﾉ♫」
Let it go，I don’t Care
Let it go 呢首歌聽過啦掛！ 佢嘅旋律好容易令人記住， 特別係Let It go呢句嘅歌詞都令人印象好深刻， 好多人覺得呢首歌好正好有活力好澎湃好好聽所以就鍾意聽呢首歌， 覺得呢首歌入邊主角Elsa好有型係個女強人， 覺得佢夠膽拋開屋企啲煩惱自己離家出走好有型。 對於我來講， 我係睇到另一面，我睇到嘅係Elsa 故作瀟灑傷心黯然嘅一面。 有得揀，你估佢真係好想Let it go？
Don’t let them in, don’t let them see
Be the good girl you always have to be
Conceal, don’t feel, don’t let them know
以上呢段歌詞就是說父母逼我匿埋喺房，就算自己唔讀書都唔好影響到人， 自己頹廢自己事。 所以我就成日匿埋喺房， 然後就俾人話係廢青，淨係識得收埋自己，變成惡性循環， 值得注意嘅係我根本冇自己房，我係匿喺一間擺滿雜物又焗又多昆蟲嘅房。
Let it go, let it go
I am one with the wind and sky
Let it go, let it go
You’ll never see me cry!
Let it go！唔理lu～ 我有我放任做我鍾意嘅嘢， 反正我可以呼風喚雨（p.s. 小學時候， 我寫咗個關於寵物小精靈攻略嘅網站，嗰時互聯網仲未係非常流行，我個網站已經有千幾個會員！ 那時候的確喺網上搵到啲成就感）， 你以後唔會見到我喊㗎啦！ 以上係歌詞大概嘅內容。知唔知點解你以後唔會見到我喊？ 因為我喊到匿埋喊囉，唔通喊俾你睇咩？ 所以呢段歌詞大部份人覺得Elsa係好堅強， 我淨係覺得佢好慘，我唔信佢夜晚瞓覺唔會匿埋喊。
長大後，兄妹情如何？
OK嘅，始終人大左，大家明白嘅嘢都多咗，亦都開始識得互相體諒互相忍讓， 不過至少係我內心係有一個永遠冇辦法磨滅嘅遺憾， 就係喺最有童真嘅時候冇辦法同細佬妹有最美好嘅回憶， 宜家大個咗同佢哋關係好已經唔同以前， 因為人大咗就要出嚟工作，出嚟做嘢自己都已經冇晒生活冇乜夢想冇乜希望嗰啲， 已經唔係細細個仲可以天真快樂咁一齊玩一齊打機一齊睇卡通片嘅日子。 如果時光可以倒流， 我希望返返去同細佬妹一齊坐定定喺電視前面睇寵物小精靈、數碼暴龍同埋其他有趣嘅卡通片。
有兄弟姊妹嘅各位， 希望大家好好珍惜， 珍惜你哋之間嘅友誼同回憶。
.
.
.
【在更多平台追蹤Kyuuwani】
▶ 官方網站：https://kyuuwani.com
▶ Instagram：https://instagram.com/kyuuwani
▶ Spotify：https://podcast.kyuuwani.com
▶ Facebook：https://facebook.com/kyuuwani
▶ Twitter：https://twitter.com/kyuuwani
▶ YouTube：https://yt.kyuuwani.com
