Kyuu & Wani 嚟咗西貢，原本係只係諗住去白沙灣碼頭行下，就去西貢公眾碼頭嗰邊揾嘢食。點知，就喺行去西貢公眾碼頭嗰段路，俾我地發現咗西貢獅子會自然教育中心呢個地方。好即興咁就開始咗Kyuu & Wani自然生態遊啦～
西貢獅子會自然教育中心入面有好多展覽館，室內嘅展館包括貝殼館、昆蟲館、漁館同地質公園遊客中心等等，而戶外嘅場地就有唔同礦石、動植物標本同農作物。由於我地發現呢個地方發現得太晏喇，室內展館下晝4點半就閂咗，我地接近5點先到，所以就錯過咗室內展覧館喇～不過，剩係睇戶外展區嘅嘢都睇唔哂。我地揀咗幾個位嚟睇，礦石角、農作物、趣味植物，同埋中草藥園。
先講下礦石角，一路行短短嘅觀看遊步道，左右兩邊都有幾十種由香港唔同地方、唔同年代搜集得到嘅礦石標本。最好嘅地方係我地可以用手摸下呢啲岩石，唔係剩係用眼去睇。
第二站，我地去咗農作物區睇，見到好多平時我地街市會見到嘅菜，好似西洋菜、蕃茄等等。
再行就嚟到趣味植物區，有啲植物都真係少見到。最開心係見到怕醜草！以前香港好似常見啲，但近幾年好似絕跡咗咁。仲記得Kyuu以前讀小學嘅時候，有位老師送嘅獎禮唔係文具、貼紙，而係送細細盤嘅植物俾學生，嗰時Kyuu就揀咗一盤怕醜草返屋企種，每日我返學前、放後後都用手輕輕掂佢，睇住佢合埋就覺得好得意、好好玩。估唔到，嚟到獅子會自然教育中心見返怕醜草，勾起返唔少童年回憶呀！
呢個地方都幾岩小朋友認識大自然生態，認識下平時食嘅生果蔬菜原貌係點，又可以教育下佢地保護大自然嘅重要性。大人嚟都唔錯架，Kyuu & Wani今日嚟到見到都冇唔少大人嚟行下、喺草地坐下野餐、放狗。如果大家行到攰，呢個自然教育中心入面仲有間「聰鳴茶座」可以食下野。不過，我地去到已經閂咗門。建議打算嚟就要早少少喇～
其實西貢獅子會自然教育中心入面仲有蕉坑自然教育徑可以行，不過時間有限，Kyuu & Wani今次就冇行，唯有留返下次去嘅時候再同大家介紹啦喇！
***🧳🚃🚅🚂🚇✈️🚀🚁🚤🚢***
下一次去邊好 👉🏻 童年回憶尋寶之旅！灣仔太原街｜遊山玩水 | Kyuu & Wani
更多好去處 👉🏻 遊山玩水 | Kyuu & Wani
