想過一個寫意嘅下午?Kyuu & Wani介紹大家可以去黃泥涌水塘行下,去呢個隱世綠洲探險啦。要去黃泥涌水塘公園,可以去中環交易廣場坐6號巴士,喺黃泥涌水塘公園站落車。一落車就會見到油站,我地喺油站買咗啲零食,就行上油站隔離嘅樓梯。上到去就會到大潭水塘道,左轉上山,好快就會見到黃泥涌水塘公園。
以前黃泥涌水塘公園有水上單車玩,可以一邊踩住水上單車、一邊餵魚餵龜。好可惜喺2017年就冇得再踩水上單車,因為提供水上單車服務嘅承辦商決定唔再入標,結束營業。黃泥涌划艇公園只能成為大家嘅回憶。雖然冇得踩水上單車暢遊水塘,但係呢度嘅風景依舊咁靚,而且水塘可愛嘅魚同龜都係水塘度游嚟游去,環境依舊清幽,令人心曠神怡。Kyuu & Wani 去個日可能有少少微雨,加上冇左水上單車活動,只有幾個人黎公園。
公園有有蓋座位同飲品販賣機,我地坐低飲野,獨佔美景,真俾好寫意。停咗雨之後,我地去咗黃泥涌水壩行下。可惜個日落雨,我地就冇去埋附近紫羅蘭山徑行下。有機會Kyuu & Wani會去行下。
去黃泥涌水塘都算方便,而且路線輕鬆,推介大家嚟享受下呢個隱世秘景,過一個寧靜寫意嘅下午。
***🧳🚃🚅🚂🚇✈️🚀🚁🚤🚢***
下一次去邊好 👉🏻 港版「天空之鏡」?流水響仙境遊|遊山玩水 | Kyuu & Wani
更多好去處 👉🏻 遊山玩水 | Kyuu & Wani