你聽過未?謎一般的樂器:Kalimba|莫札特輯|香港Podcast

Share on twitter
Share on facebook
Share on telegram
Share on whatsapp
Kyuu & Wani - 你聽過未?謎一般的樂器:Kalimba|莫札特輯|香港Podcast

想彈琴陶冶性情,但係一座鋼琴咁貴、屋企又冇大個位放,點算好?

何謂拇指琴

今次要同大家介紹一樣謎一般嘅樂器,拇指琴(Kalimba)。佢係一種非洲民族嘅彈撥型嘅體鳴樂器,喺撒哈拉以南非洲相當普遍。時之今日,拇指琴喺歐美、澳洲同亞洲等地都有生產㗎。3000幾年前,喺西非地區最早的Kalimba喺利用竹同樹製作出嚟嘅,而用鐵條整嘅Kalimba就由1000幾年前先開始出現嘅。聽講,當時非洲民族深信,由Kalimba所演奏出嚟嘅音樂唔單止能夠趕走病人身上嘅邪氣,仲起到祈雨嘅作用,所以拇指琴一直深受非洲人喜愛。

宜家最常見嘅Kalimba係由唔同長度嘅金屬片固定喺木板上面製成嘅,用雙手拎起拇指琴,用雙手拇指同時或者輪流彈奏。拇指琴嘅琴身一般以木材製成共鳴箱,分箱形同板形,上面附有多條長短不一的舌狀金屬片「琴鍵」,唔同長度嘅金屬片可以彈奏出唔同嘅音調,最常見嘅係C大調為主嘅17個琴鍵拇指琴。由於拇指琴體積細小,加上易彈易學,只需用雙手拎住琴身,透過拇指指甲按壓同回彈,或者撥動琴鍵就發出動聽嘅樂聲。零音樂經驗嘅人只需要睇住數字譜跟住彈,就已經可彈到生日歌、小星星等嘅簡單旋律。再進一步彈下啲流行情歌都比其他樂器相對容易上手。一部拇指琴嘅售價大概幾百蚊左右,係相對比較容易入手嘅樂器嚟。

木材和音色的關係

拇指琴嘅吸引之處,除左細小輕巧、價錢較平之外,係佢能夠發出如音樂盒般嘅清脆音色,簡單學習已可彈出著名樂曲。但係原來唔同嘅木材整出嚟嘅拇指琴都有唔同嘅音色㗎喎!市面上最常見嘅Kalimba喺由虎紋台灣相思木和淺色嘅桃花芯木製成嘅,聲音較清脆,似足音樂盒發出嚟嘅聲音。如果係用較高質素嘅嘅木材,好似係阿里山檜木整出嚟嘅拇指琴呢,佢嘅音色渾厚優美一啲。喺結他背面常見到印尼玫瑰木整成嘅拇指琴呢,音色就較沉實,同埋高音會更加穩定。至於全楠竹木呢,整出嚟嘅拇指琴,發出嚟嘅聲就冇竹咁清脆,但反而有一種穩重柔美嘅音色。大家就可以按個人喜好嘅音色或者中意嘅木材去揀自己心儀嘅拇指琴。另外,拇指琴嘅琴身分木箱形同木板形。由於木箱空心,能夠用拇指彈撥出音口發出共鳴音,好似結他咁。 所以,佢演奏嘅方法比木板琴身嘅拇指琴更加豐富。

始終拇指琴係由木材同金屬整出嚟嘅。香港天氣潮濕,會令拇指琴容易發霉。唔想咁快玩壞部Kalimba,就要學我識好好保養部琴啦。建議大家可以喺放拇指琴嘅琴袋入面放啲防潮包。而金屬琴鍵如果生咗鏽呢,可以專用嘅防鏽除鏽護弦油筆整走嘅鏽迹。最好每次彈完都輕輕用布抹下部琴啦。抹布通常買拇指琴嘅時候都有包埋嘅。如果拇指琴真係有損毁嘅情況,當然揾返樂器店維修或者更換金屬片琴鍵。

自學拇指琴不是夢

Kyuu & Wani 點解會認識Kalimba呢?其實係聽流行曲歌嘅時候,見到有外國嘅youtuber用Kalimba做咗首歌嘅cover,先發現原來有咁好音色嘅樂器。我地好中意Klimba夠細部,帶出街一齊彈奏都好方便。Kalimba另一樣好嘅地方,係上youtube自學都容易。不過kalimba始終未咁普及,上網揾到嘅樂譜都唔係太多。希望之後會有多啲人都認識,什至會玩呢一樣樂器,好似ukulele咁愈嚟愈流行啦~學一樣樂器,一開頭嘅階段當然係比較吃力,彈拇指琴一開頭都會經歷彈到手指痛嘅經歷,但捱過咗開頭,堅持每日練習,當彈到嘅樂曲之後,就會好有成功感架喇~如果想彈琴,但又冇咁多budget,不妨試下買部拇指琴自學下,宅喺屋企或者帶出街都玩得~

 

Share on twitter
Share on facebook
Share on telegram
Share on whatsapp

Leave a Comment

Your email address will not be published. Required fields are marked *