《靈魂奇遇記》2021必睇的動畫大作!|好戲好書

Share on twitter
Share on facebook
Share on telegram
Share on whatsapp
Kyuu & Wani - 《靈魂奇遇記》2021必睇的動畫大作!|好戲好書

上個月戲院重開,Kyuu & Wani作為Pixar嘅Fans就去咗睇佢地製作嘅原創動畫作品《靈魂奇遇記》啦!Pixar嘅動畫不嬲都係用唔同嘅方式引發我哋觀眾對人生嘅反思。今次《靈魂奇遇記》都唔例外,呢次Pixar就用一個輕鬆嘅形式帶大家探討下人生意義、生同死等等嘅議題。

《靈魂奇遇記》2021必睇的動畫大作!|好戲好書

原本一開頭Kyuu & Wani都以為係講男主角Joe點樣成為一個爵士樂手嘅追夢故事。宜家好多嘅故事、電影都係鼓勵我哋去努力、勇敢去追夢,要為自己嘅夢想而活。但係,《靈魂奇遇記》所講嘅係另一個角度。

我地由細個嘅時候就已經俾父母或師長教,「生活要有目標、要有夢想」,作文題目「我的志願」相信大家都作過。我哋由細到大,就去思考、去揾我哋嘅夢想同興趣,希望透過目標、夢想揾到自己生存嘅意義、生命中嘅「火花」。Pixar就透過《靈魂奇遇記》提醒我哋:生活係要有目標,但我哋唔係剩係為咗呢個目標而生活,唔好太過執著於成就同夢想。生活充滿着好多可能性,要好好享受當下,即使係身邊好微細嘅事物都要好好感受,好好的活着,就已經係我們生存嘅意義。

《靈魂奇遇記》2021必睇的動畫大作!|好戲好書

男主角Joe終於追到自己爵士樂手嘅夢之後,佢話「每日朝思暮想嘅夢想,當真俾實現咗之後,原來冇想像中咁高興」。呢句令我哋諗起自己每次完成目標之後,都會有空虛感、感到好迷失。好似高中嘅時候好努力去備戰DSE,到放榜入到心儀嘅大學嘅時候,當下係好開心,但過陣就會諗:終於成功啦,跟住又點呢? 又去揾自己下一個嘅目標,想喺人生中再有下一個成就。但係,我地就成日忘記咗生活嘅「火花」,唔單單係完成一個又一個嘅目標,而應該係好好咁活在當下,享受自己投入做每一件事嘅過程。

我哋可能冇一啲好明確嘅理想、揾唔到人生方向,覺得自己好似庸庸碌碌咁過活,好迷失、好厭世。但係,《靈魂奇遇記》就話俾我哋聽,唔需要一啲理想、成就去證明自己嘅人生意義,因為人生存在着、享受着,就已經係你我嘅人生意義。

《靈魂奇遇記》2021必睇的動畫大作!|好戲好書

睇完《靈魂奇遇記》再諗下,原來我哋Kyuu & Wani 錄咗Podcast後,不知不覺間我哋都比以前更加用心咁感受生活嘅一點一滴,即使係日常嘅瑣碎事我哋都留意多咗,感受微小嘅事美好嘅部分,學習熱愛我哋生活嘅每一刻。希望將呢啲生活經歷、即使係微不足道,都記錄低,甚至分享俾聽眾。

《靈魂奇遇記》真係一套值得大家睇嘅動畫,呢套動畫大作最近仲得到咗第78屆金球獎最佳動畫,真係實至名歸呀~《靈魂奇遇記》2021必睇的動畫大作!|好戲好書

 

Share on twitter
Share on facebook
Share on telegram
Share on whatsapp

Leave a Comment

Your email address will not be published. Required fields are marked *