年初六又到啦～祝各位Kyuu & Wani讀者年初六生活愉快！相信大家都知道，農曆新年有唔少傳統習俗，去到現代，呢啲所謂習俗都冇話一定要跟足㗎啦，唔會好似以前嘅年代咁，做少啲新年習俗就驚會帶來不幸。不過其實現代人如果參考新年習俗，可以用另一個角度睇，當係一種生活情趣，今日Kyuu & Wani就大比大家，究竟農曆新年年初六傳統係有乜嘢習俗㗎喇。
初六點解又洗廁所嘅？根據農曆新年傳統習俗，原來相傳年初六係「廁所神」巡查衛生嘅日子。廁所神會喺年初六當日，逐家逐戶檢查住戶嘅廁所係咪乾淨，如果廁所夠乾淨，廁所神會保佑全家全年都健康！健康人人都想有㗎喇，所以如果想得到廁所神係年初六嘅護陰，大家喺年初六記住要徹底洗好個廁所啦。
呢個世界真係咩神都有，估唔到連廁所都要整返個廁所之神。寧可信其有，趁住今日年初六，我地都去洗下個廁所先～不過咁講，就算呢個世界係咪真係有年初六嘅廁所神，我哋作為講究維生嘅香港人，就算有冇廁所神，都要成日洗廁所㗎啦～既然新年初六要洗廁所，今日Kyuu & Wani就大比大家幾個洗廁所技巧。
- 用水刮：廁所地下成日都會濕，嘅如果用地拖、地布抹乾個地下，有排都抹唔乾啦。其實可以買一樣野叫做「水刮」，將啲水刮去廁所個去水位，唔使半分鐘，成個廁所地下就乾得七七八八。
- 威猛先生抹玻璃：廁所入邊嘅玻璃類東西，例如鏡面、浴屏等等，用耐咗會有好多水漬嘅，就咁用手抹有排都買唔乾淨，可以用啲強力嘅玻璃專用清潔劑，例如威猛先生咁 。
- 馬桶除臭器：講到廁所最臭嘅莫過於係個馬桶，如果想個廁所自動變香，可以放個馬桶除臭劑。當你一衝廁，就會自動放埋啲除臭劑入去馬筒，減輕咗好多功夫。
祝大家年初六快樂！身體健康，廁所乾淨！聽日就係新年嘅年初七啦，所謂初七就係「人日」即係人人都生日喎，大家準備好生日禮物未 ;)？你哋又知唔知農曆新年初七有乜嘢傳統習俗呢？
香港Podcast有得聽：年初一原來唔一定去拜年？｜西張東望｜香港Podcast | Kyuu & Wani
