今次係Kyuu & Wani第二次去大澳。去大澳，除咗睇當地特色漁村水上棚屋、買蝦醬同鹹魚等等嘅手信之外，原來仲有一座適合新手行嘅山，佢就係虎山啦。第一次去大澳，我地就錯過咗呢個咁靚嘅山，所以今次再去就plan咗點都要去虎山行下。
我地揾咗一個平日嘅中午，去到東涌站坐 11 號巴士嚟到大澳。第一站唔係即刻去虎山。而係去之前嚟大澳都錯過咗嘅景點之一，大澳鄉事委員會歷史文化室度睇下。入面可以睇返以前大澳居民嘅物品用具，好似裝船嘅用具、捕魚工具等等，仲有好多舊相我同拆毀咗嘅古建築樑柱。睇下個時嘅大澳歷史都幾得意。大澳鄉事委員會歷史文化室係免費參觀架，大家去大澳，不妨都入我去行一轉啦。
行完大澳鄉事委員會歷史文化室，我地食咗啲小食，就去睇下水上棚屋，影下相。行下行下，仲遇到可愛嘅貓貓～
行入村，過埋橋，一直行去少林寺。到咗少林寺，會見到左邊有條小山路，沿住條小山路一直行，10至15分鐘左右就到咗虎山觀山亭。虎山個名聽落好似好難行，但原來係好輕鬆就行完，唔好俾佢個名呃到～係紅橋可以影下相、睇下海。不過，就睇唔到中華白海豚啦。
落咗山之後，我地睇埋日落就坐返11號巴士返東涌啦。喺車上面，有個女士拎住自己部手機，展示自己啱啱係大澳影嘅日落相俾佢朋友睇，然後成程車講左十幾次「個咸蛋黃好靚」。雖然講咁多次有啲誇張，但我佢真係又講得冇錯，個日個咸蛋黃真係好靚～
今次去大澳時間有限，冇去埋大澳文物酒店度睇下，留返下次再嚟大澳再去行下。
下一次去邊好 👉🏻 趕船去塔門食海膽三文治？｜遊山玩水 | Kyuu & Wani
更多好去處 👉🏻 遊山玩水 | Kyuu & Wani
