Kyuu & Wani 第一次去塔門，差啲就去唔成？我地揀咗一個星期日去，雖然會比平日多人，但係船期相對較多。Kyuu約咗Wani喺馬料水碼頭等，打算坐12：30開出嘅船。點知Wani 12：00仲未起身，唯有坐的士趕嚟碼頭啦。
好彩好彩，最終都趕上12：30班船，坐街渡出發去呢個位於西貢以北嘅小島。坐咗一個鐘頭多啲就到塔門啦～今次冇暈船浪～同埋全程都有位坐！呢隻船真係超多人，好多人都帶咗露營用品、一袋二袋咁，仲有好多人帶埋自己嘅狗仔上船。呢班船除左我去塔門，仲會去深涌、荔枝莊等等地方。Kyuu & Wani遲啲都可能會去下呢啲地方探險～
坐船都發生咗件事，就係隔離有個女人無啦啦大嗌，鬧前幾行嘅細路仔做咩係咁擰過黎指住佢，搞到船上嘅人都呆左一呆，包括Kyuu & Wani。
一落船就隨意揀咗附近一間茶餐廳新惠和食當地最出名嘅海膽三文治同咸檸茶。雖然有啲貴，但難得嚟到都要試下~飲完支咸檸茶一試難忘！咸檸七就有飲過，但咸檸茶就係Kyuu & Wani都係嚟到塔門先第一次飲！所以，臨走之後我地再買左支飲呀～
再去山上一大片草原睇牛，上面好多人都喺山上露營。
之後，我地都去左塔門天后廟參觀，聽講天后誕嗰陣島上嘅漁民都會去天后廟度上香祈求平安。有機會Kyuu &Wani都希望再嚟塔門，可能會試下露營啦~
更多好去處 👉🏻 遊山玩水 | Kyuu & Wani
