除咗行山親親大自然之外，Kyuu & Wani平時都會去市區行下街嘅。今次我地就嚟咗灣仔行吓。平時我地都好少嚟灣仔呢邊嘅。除咗以前中學時期會嚟灣仔運動場參加學校嘅運動會、同埋每年暑假會去喺灣仔會展搞嘅書展之外，都好少會專登嚟灣仔。今次我地嚟灣仔，本來就剩係去睇下灣仔電腦城同298電腦特區睇下啲電子嘢嘅，但行行下嚟到太原街市集，就突然展開咗我地嘅尋寶之旅喇。
太原街市集唔係好起眼，但就算我哋喺平日嚟，都好多人行呢條街。太原街之所以咁人頭湧湧，係因為佢係一條玩具街，其中以鴻興玩具同日昇玩具最出名。除咗玩具，太原街仲有好多車仔檔，賣下啲日用品、古玉飾物同裝飾品等等。
入面有好多懷舊嘅玩具，有Kyuu & Wani最鐘意嘅Black Jack盒裝模型，又有Wani最鐘意嘅寵物小精靈大大小小嘅模型。Wani喺玩具店度尋到寶，就係細細隻嘅ワニノコ！平時賣寵物小精靈嘅玩具店，都唔係成日揾到ワニノコ嘅蹤影。所以今次對Wani嚟講真係大收獲啊！
（如果想知 ワニノコ有咩咁特別就要聽返我地之前嘅Podcast啦～傳送門：Pokemon小火龍、啟暴龍，你仲識邊隻？｜電競日誌｜香港Podcast | Kyuu & Wani）雖然Kyuu就冇買到嘢，但睇住玩具店入面好多熟悉嘅卡通動漫角色，童年回憶都返哂嚟呀～
去太原街市集都好容易，喺灣仔A3出口，行5分鐘左右就到㗎喇。如果大家都想重拾下童年回憶或者嚟尋下寶揾返啲懷舊玩具，嚟開灣仔就去太原街市集行下喇～
***🧳🚃🚅🚂🚇✈️🚀🚁🚤🚢***
下一次去邊好 👉🏻 情人節好去處！泥涌石灘漫步人生路｜遊山玩水 | Kyuu & Wani
更多好去處 👉🏻 遊山玩水 | Kyuu & Wani
