今日係大年初三，又係情人節！唔使拜年嘅Kyuu & Wani，今日有咩情人節活動？就係去咗泥涌石灘啦～我地一朝早就約咗係沙田，食個Lunch先，跟住就喺沙田市中心巴士總站坐299x巴士去泥涌。去到巴士站見到好多人等車，好彩15分鐘左右就有下一班車，唔算耐。我地喺泥涌站落左車。
落到車見到有工程進行緊，不過都有好清晰嘅指示牌指示我地去泥涌石灘。行幾分鐘，西貢泥涌秘境就在眼前！泥涌石灘面向吐露港，睇住平靜嘅海面同對面一座座小山，真係身心舒暢啊。大家要注意喺石灘濕滑，同埋建議大家着啲防水鞋，因為要去近海邊都要踩過濕泥。而且，石灘都有好多蠔殼同碎石，大家要小心慢慢行，切忌着白色布鞋！
我地到石灘嘅時候，頭頂有舊大烏雲，唯有影下地下啲青苔同石仔先。影咗陣，藍天白雲終於出返嚟，即刻影到啲天空之鏡打卡相啦～
喺泥涌石灘，除咗睇下海，影下斷橋之外，都有好多活動可以玩架！好多人放風箏，玩航拍。小朋友就拎住水桶同鏟玩泥沙。今日見到好多專業放風箏嘅大師，坐住膠櫈仔放紅色風箏，好霸氣！
喺泥涌石灘見到有好多蠔同招潮蟹，睇住啲蟹仔喺泥灘上行都幾有趣。好可惜睇唔到彈塗魚。間唔中嚟下呢啲紅樹林景點，睇下自然生態都幾唔錯。
回程我地坐返299x巴士返沙田，完結我地今年嘅情人節泥涌之旅啦。之前我地Kyuu & Wani Podcast都有講往年嘅情人節點過，未聽嘅快啲聽啦～傳送門：情人節送咩好！？就到情人節啦😚😚😚｜KW二三事｜香港Podcast | Kyuu & Wani ！
***🧳🚃🚅🚂🚇✈️🚀🚁🚤🚢***
下一次去邊好 👉🏻 港島區秘境！黃泥涌水塘寫意遊｜遊山玩水 | Kyuu & Wani
更多好去處 👉🏻 遊山玩水 | Kyuu & Wani
